25. 讓平凡家庭小孩突圍而出的關鍵

1. 第25集 讓平凡家庭小孩突圍而出的關鍵

內容包括：

• 怎樣鼓勵孩子愛上閱讀
• 家中擺設與孩子閱讀的關連
• 市面上各種栽培兒童書籍最大共通點
• 從科學角度了解怎樣教孩子
• 出生於貧窮家庭的孩子怎樣突圍而出
• 「The Life Project」 作者 Helen Pearson

支持廣東話遊戲治療分享，請 Christal 喝咖啡:
https://www.buymeacoffee.com/christallau

廣東話遊戲治療分享由 Christal Lau 主持。
Christal 主修心理學，犯罪學碩士，遊戲治療碩士，為自閉症孩子作出早期干預。
這個 podcast 會由 Christal 分享與小朋友治療上的趣事，適合所有家長和對遊戲治療有興趣的朋友收聽。

Facebook: https://www.facebook.com/PlayTherapyInCantonese

Instagram: https://instagram.com/playtherapyincantonese

Transcript

EP 25 可讓生於貧窮家庭的小孩突圍而出的關鍵

我大概兩年前開始廣東話遊戲資料Facebook，發覺呢兩年來最受家長歡迎嘅post其實係一個有關點樣Encourage鼓勵小朋友愛上睇書嘅私人分享。所以我想整多個podcast同大家繼續分享一下我自己嘅個人心得，點樣令到一個小朋友愛上睇書。

喺Facebook入邊講提過，我自己生小朋友嘅時候係有下定決心想promote 小朋友鍾意閱讀呢個方向。所以第一我已經將電視放埋一邊，客廳最主要嘅家具其實一個特大嘅書架，梳化茶几枱燈喺書櫃前面，令主要hang out area 喺書架面前，久而久之小朋友冇事就會睇書而唔係睇電視。另外我屋企本來都唔會用iPad，小朋友七歲前我都冇買呢樣嘢。

都有家長同我提過，認為佢哋嘅小朋友喺iPad都可以學到好多嘢，例如學串字睇書學數學。不過已經有海量嘅研究證明電子時間比起同真人互動時間喺促進腦部發展方面其實冇得比。

另外喺揀幼稚園嘅時候都係同一個方向，我揀幼稚園嘅時候係想搵一啲會有好多書提供俾小朋友嘅，而唔係有啲地方只係基本爛書放一邊。如果想喺呢方便想了解多啲可以喺show notes 嗰度睇返我Facebook page嗰度會比較多資料。因為呢一集podcast我想集中講啲之前未講過嘅嘢。

我自己未生小朋友但係準備嘅時候，都係一個港女，而且又唔識parenting 係咩一回事。所以我記得嗰陣時我買一大堆嘅書都係一啲關於點樣令小朋友讀哈佛、培養天才兒童、又或者栽培只有小朋友嗰一類型嘅書。基本上市面上有嘅我都會睇，有台灣芬蘭德國日本我全部都睇過。入邊嘅家長都各施各法，但係我可以喺呢度話俾大家聽，所有書入邊唯一嘅共通點，就係入邊嘅父母都付出海量嘅時間好有質素咁樣陪小朋友睇書、傾偈、討論身邊嘅事物。無論日本嘅媽媽每日返嚟點樣同個仔傾功課、德國嘅牧師爸爸每日陪個仔傾偈甚至乎幫佢選擇朋友討論邊個值得一齊玩，媽媽點樣同佢唱歌、又或者去到台灣開士多嘅爸爸拖住個仔等紅綠燈嘅時候背生字，各施各法但係萬變不離其宗，就係用盡心機同小朋友討論傾偈同埋睇書好，而唔係自己拎住個電話坐喺個仔隔離陪佢做功課。

係呢方面我自己都仲有好多進步空間，令我想錄呢一集其中一個原因係因為我認識到自己小朋友一個好好嘅同學，我見到呢個10歲個女仔唔單止每一科成績都做得好彪炳，運動亦都非常之好，最令我驚訝係連平時同佢傾偈講嘢都係好有邏輯咁可以同佢討論唔同嘅觀點，比如政治上嘅人物佢都會講得出唔同嘅preference。呢位小朋友平時點樣安排自己時間都係非常之有自己嘅一套。譬如佢會話自己星期三嘅畫班上到五點，所以佢自己有興趣想再安排上女童軍必須要5:30之後，呢啲嘢我係覺得好impressive嘅。所以我就趁機去請教佢嘅父母係點樣教佢。首先我發覺佢嘅父母都好少用手提電話，爸爸其實係冇擁有一個手提電話嘅。屋企係冇電視嘅，而每一晚爸爸陪佢嘅節目就係一齊睇書，然後一齊討論書入邊嘅角度同一齊分析。好明顯有一個心智上同身體上都非常之健康嘅小朋友並唔係偶然發生嘅，呢對父母付出好多Quality time陪伴佢嘅小朋友。咁當然唔去擁有一個手提電話呢樣嘢呢我自己都做唔到，但係起碼我要學到絕對要提醒自己盡量唔喺小朋友面前拎住個電話，同埋多啲陪佢哋睇書。

家長想小朋友鍾意睇書，其中一個原因相信都係想小朋友將來知識更加豐富、心理健康、人生更加成功。所以我想同大家分享一個英國嘅硏究，用咗70年研究咗超過70,000個小朋友橫跨五個generation (五代人）。可能全球歷史上最大嘅研究，從呢個研究再衍生出嚟嘅論文同埋書都有超過6000幾份。呢個研究對人類發展都非常之重要，因為可以由科學角度去教家長睇應該點樣教小朋友。作者Helen Pearson 係佢本書「The Life Project 」提到，亦都證實咗一個大家都可能已經一早明白嘅道理，就係一個小朋友如果出身係貧窮家庭，又或者係工人階級，佢哋嘅成長就本身已經弱勢社群。研究顯示佢哋會更有可能係學校有比較差嘅成績，繼而會有冇咁好嘅職業同埋賺少啲錢。甚至乎喺健康上，呢一班出生於貧窮線嘅小朋友長大之後連身體都會冇咁健康，佢哋會更加容易超重，或者有高血壓等等疾病。喺學業上，呢一班屋企經濟能差嘅小朋友亦都係一開始就已經比同齡嘅有經濟能力嘅小朋友學業上慢一年，因為呢個研究係經歷咗五代人嘅關係，呢個理論亦都係經過五代唔同嘅小朋友證實係正確嘅。

我通常講到呢度，就會有家長話唔係喎，好多時出身貧窮嘅小朋友都會零瀉生性，會更加出人頭地喎。呢個冇錯，而呢個研究就正正可以解釋點解喺一班出身貧窮線嘅小朋友中，會有少部份可以排除萬難成為更比較成功嘅人。

呢個研究指出重點就係父母陪小朋友嘅時間。從小嘅時候父母有冇quality time (有質素的陪伴），父母係咪有趣，對小朋友嘅將來係咪有抱負，呢啲對小朋友尤其是剛出生嘅幾年係尤其重要。

書入面提到有其中一個科學家用研究入面嘅17,000個小朋友，重新再睇佢哋嘅資料研究後來成功嗰啲小朋友，同另外一啲停留喺貧窮線嘅究竟有乜嘢特別唔同。研究就顯示最大嘅分別就係嗰班小朋友嘅父母，佢哋有幾多時間陪小朋友，佢哋點樣同小朋友傾偈，一齊睇書，同埋會有穩定嘅作息時間。就斷定左呢班小朋友將來喺學校成績如何。嗰啲每日有家長陪佢哋讀書嘅小朋友，比起另外一班冇家長陪伴嘅，冇睇書嗰班喺佢哋30歲嗰年仍然喺貧窮線以下係有非常明顯嘅因果區別。

呢本書仲提到另外一個好有趣嘅研究，科學家會比較一班平時為咗興趣而閱讀嘅小朋友，無論係睇雜誌，故事書，或者圖書，研究都顯示呢班小朋友嘅學業成績無論係英文閱讀理解或者作文，就算係數學成績都會比唔為興趣閱讀嘅小朋友更加好。

咁我一開始提到關於小朋友如果出身係貧窮線但係有我努力陪伴佢哋嘅父母，成日陪佢睇書，亦都係一個好好嘅作息時間，係咪就代表佢哋會同其他小朋友一樣，出身係邊個demographic（經濟上唔同族群）嘅家庭其實冇分別？好可惜呢研究顯示並唔係咁，父母努力嘅付出只可以彌補貧窮線以下出生小朋友同其他小朋友嘅差距，如果出身背景較好嘅小朋友再加上願意付出有質素陪伴嘅父母，貧窮線以下嘅小朋友基本上係追唔上。

咁大家都諗到係咪咁簡單陪佢睇書就可以呢，咁當然唔係。因為呢一個研究係睇成千上萬個小朋友，但係唔代表佢applied係你自己嘅小朋友。因為每個人出世嘅基因有唔同，每個小朋友會有佢哋自己嘅路行。而我哋就只能夠盡我哋嘅能力去幫助佢哋。

咁了解呢啲研究代表我哋做父母嘅可以點樣呢，我同大家都一樣平時好忙好多嘢要做，返工、我繼續讀書、屋企嘅家頭細務。不過我而家每次送佢哋返學放學都會盡量同佢哋傾偈，盡力去問佢哋嗰日嘅感覺係點，返學嘅生活係點。當然亦都會繼續提供好多唔同嘅書俾佢哋睇，話俾佢聽佢哋對未來嘅期待可以係任何嘢，呢啲舉動點樣講對佢哋將來都會係有正面嘅幫助。

呢一集就講到呢一度，記得小朋友有進步讚佢哋之餘記得俾返啲Credit讚吓自己佢哋叻左你做父母有好大嘅功勞㗎下一集再傾拜拜！